عمل الدجاج المقلي او الكوكي او ال كنتاكي
الطريقة سهلة جدا وانا باعملها متخيلتش انها هاتطلع نفس اللي بره انا جربت طرق كتير جدا كان الطعم قريب اوي لكن دي نفس الطعم بجد جربوا واحكموا بنفسكم
المكونات
فرخة صغنونة كيلو و٣٠٠ جرام ماتزيدش عن كيلو ونص مغسولة طبعا كويس ومتقطعة ٩ قطع وزغزغوها بالسكين كده عشان التتبيلة تدخل فيها
التتبيلة
معلقة كبيرة توم باودر
معلقتين كبار بابريكا
معلقة كبيرة شطة
اللي عاوزها سبايسي يعكس يحط معلقتين كبار شطة وواحدة بابريكا
ث اكياس مرقة فورية او عاديه متدوبه في شويه لبن دافين ونص معلقة كبيرة ملح
المرقه مهمه عشان بتخلي طعمه زي بتاع المطاعم
بس كده
هاتدوبي التتبيلة دي ف كوبايتين لبن كبار وتحطي فيهم قطع الفراخ وتسبيها ١٢ ساعة او اقل حاجة ٤ ساعات
تجهزي طبق فيه ٣ كوبايات دقيق ونص كوباية نشا وكيس بكينج باودر وتقلبيهم مع بعض كويس
وطبق تاني تكوني حاطة فيه مية سقعة
بس كده تطلعي قطع الفراخ ف خليط الدقيق وتدحرجيها كده شوية ف الدقيق من غير ماتضغطي عليها وتغمسيها غمسة واحدة ف المية الباردة وتحطيها تاني ف الدقيق وبعدين تنقليها ف مصفاه واسعة وتنخليها عشان الدقيق الزيادة يطلع والخطوة دي كمان مهمة عشان تديكي التأثير الخارجي المقرمش ده بس كده تطلعيها تقليها ف زيت غزير يادوب يكون مغطي الفراخ اول ماتحطيها وطي عليها خالص هاتقعد بالظبط من ١٥ ل ١٨ دقيقة وتنشليها علي ورق مطبخ ومتخافوش مش هاتتحرق منكم هاتستوي وتبقي زبده من جوة ومقرمشة من برة
تعليقات
إرسال تعليق